O programa Silleda 10 sorteará un gran premio final con compras por valor de 500 euros

 

-Na xornada de feira, o día 23, haberá 10 sorteos con premios como lavados de coche, revisións pre ITV en tallerres ou lotes de produtos de limpeza, por xentileza de empresas locais

-A campaña comeza mañá nun total de 54 establecementos, que tamén abrirán ao público o domingo día 17

 

Silleda, 13 de marzo de 2013. O programa Silleda 10, para a dinamización do comercio, comeza mañá nun total de 54 establecementos de distintos sectores. Todos eles contarán no seu interior cun espazo dedicado a produtos protagonistas, todos de calidade 10 e a prezos 10. A gran maioría das  diferentes ofertas e propostas xa poden consultarse na web www.silleda10.com. Os descontos van dende o 10% ata ofertas en produtos estrela ou mesmo descontos a todos os produtos dun mesmo establecemento.

A campaña, coa calidade como máxima, continuará ata o vindeiro sábado día 23, xornada final que terá como broche de ouro unha feira exterior na rúa Cartaxena na que estarán presentes a grande maioría dos establecementos que participan nesta iniciativa. Ademais da venda de produtos, a cita, en horario de 10 a 10 contará con degustacións a cargo da Asociación Cultural O Lacón de Silleda e a Asociación de Amigos da Empanada da Bandeira.

Tamén nesta xornada se celebrarán un total de 10 sorteos, ás horas e 10, para o que se repartirán un total de 5.000 rifas entre os clientes durante estes días. Entre os premios figuran tres lotes de produtos de limpeza por valor de 75 euros cada un, donados pola firma local Disiclín; dous premios de de 20 €  cada un equivalentes a 10 lavados normais de coche (cada premio), por xentileza da Estación de Servizo Silleda; ou 20 puntos de revisión gratuita de vehículos ou pre ITV, que inclúe revisión de niveis, desgaste de elementos, freos, análises de gases; comprobación de perdas de aceite, pastillas de freo…Estes premios chegan da man de varios talleres silledenses (Barrio , Carbón, Dario,  Taín, Tato e Sixto). Dende a organización faise extensivo o agradecemento a todas as empresas que participan “apoiando tamén esta iniciativa pioneira e novidosa”, engade o concelleiro de Comercio, Klaus Brey, así como das asociacións gastronómicas.

 

Xa por último, o gran sorteo final, previsto para as 20.10 horas, consistirá nun premio de 500 euros para gastar nos establecementos participantes no programa. Este premio é aportado polos propios comercios e empresas que forman parte da iniciativa, que agora agarda á resposta do público.

Apertura o domingo 17

Entre os 10 días que durará a campaña, tamén se inclúe a xornada do vindeiro domingo 17, no que os establecementos participantes estarán abertos ao público no seu horario habitual. A Concellería de Comercio, dende a que se promoveu esta iniciativa pioneira, restalta a grande implicación dos comercios, locais hostaleiros e casas de turismo rural adheridos e anima a todos os veciños e visitantes a achegarse a coñecer as ofertas e a calidade dos produtos que serán protagonistas desta campaña.

 

 

O Concello revisará os criterios de protección de zonas arqueolóxicas no PXOM para permitir construccións na zona de respeto

 

 

Silleda, 27 de febreiro de 2013. O goberno municipal de Silleda adoptou a decisión de revisar os criterios de protección nas zonas arqueolóxicas do municipio. Esta modificación foi proposta xa á  Asociación de Veciños Santiago Apóstolo da parroquia de Taboada, que presentou un escrito amosando a súa preocupación xa que castro existente nesta localidade está alterado e os veciños vían excesiva a afección tendo en conta o estado deste xacemento.

Deste xeito, e logo da reunión mantida onte pola alcaldesa, Paula Fernández Pena, cos veciños de Taboada e cos técnicos redactores do plan adoptouse a decisión de revisar os criterios nas zonas arqueolóxicas de todo o territorio municipal.

Segundo explica a alcaldesa e concelleira de Urbanismo, a protección integral como Solo rústico de protección do patrimonio arqueolóxico ou cultural afectaría só á zona onde se ubiquen os bens culturais, mentras que o resto do ámbito que o rodea, denominadas zonas de respeto, figurarán como solo rústico, que segundo corresponda serán de protección agropecuaria, forestal ou de  augas .

“Deste xeito, nas zonas afectadas por xacementos poderíanse realizar construcción vinculadas ao rural , segundo o tipo de solo rústico que lle corresponda, contando sempre, e en todo caso, coa autorización de Patrimonio, que segundo o estado e o interese dos xacementos podería esixir un control arqueolóxico previo a calquera actuación”, engade Paula Fernández.

Bandos informativos

Nas reunión mantidas ata o de agora  nas parroquias víñase informando aos veciños/as e propietarios/as do rural que nas fincas que quedaran afectadas pola existencia de castros ou outros xacementos só se podían facer labores de cultivo ou cerramento de parcelas. Agora, a modificación dos criterios será informada mediante bandos municipais no rural. Así mesmo, dende a Concellería de Urbanismo faise un chamamento a todos os veciños afectados por xacementos arqueolóxicos para que se acheguen ao departamento a consultar as súas dúbidas sobre estas cuestión.

“Esta decisión vai a mellorar as condicións das fincas do rural situadas preto de castros, mámoas…, sempre sen menoscabar a protección destes bens culturais”, sinala Paula Fernández.

Hoxe, última reunión na Bandeira

Por outra banda hoxe remata no auditorio municipal Manuel Dopazo a axenda de reunións informativas sobre o PXOM. Á reunión están convococados os veciños/as e propietarios/as da parroquia de Manduas, incluíndo á localidade da Bandeira. O calendario abriuse o pasado día 4 de xaneiro en Parada.

Do mesmo xeito, o documento pode consultarse nas oficinas de Urbanismo e tamén na web municipal. Estará exposto ao público ata o vindeiro 17 de marzo, logo da publicación da aprobación inicial no DOGA o pasado 16 de xaneiro co que se abriu o periodo de dous meses, o máximo por lei, de consultas ao público.

 

O Concello de Silleda promove unha iniciativa pioneira para dinamizar o comercio local

Silleda, 21 de febreiro de 2013. O Concello de Silleda, a través da Concellería de Industria e Comercio, promove a campaña Silleda 10, unha iniciativa pioneira para dinamizar o comercio local. Xogando co número 10, símbolo da calidade, o programa estrearase entre os días 14 e 23 de marzo próximos. Serán 10 días de produtos 10, a prezos 10.

En total participan 54 establecementos, de sectores moi diversos, dende comercios de moda e complementos, electrodomésticos, mobles ou xoiarías pasando por alimentación, zapaterías, ou negocios relacionados coa saúde e o benestar, librerías ou florerías.

O programa municipal, co que se busca dinamizar a economía local foi presentado hoxe nun acto presidido pola alcaldesa, Paula Fernández Pena, e ao que tamén asistiron o concelleiro de Comercio, Klaus Brey e unha nutrida representación  do comercio local silledense.

Ademais de comercios, tamén se sumaron establecementos de turismo rural e restaurantes, que ofertarán promocións e descontos durante esta campaña. “Tamén trataremos de que os bares e cafeterías fagan algún tipo de promoción durante estas datas”, sinalou a alcaldesa.

Entre os días 14 e 22 de marzo todos os establecementos participantes, de Silleda e A Bandeira, contarán cun espazo adicado ao programa, con productos 10, a prezos 10.Todos os participantes terán nestes días “ofertas 10 como reclamo para atraer ao maior número posible de clientes”, engadiu.

Venda na rúa de dez a dez e sorteos

O décimo e último día, o sábado 23, celebrarase unha xornada de venda na rúa Cartaxena, onde os establecementos ofertarán os seus produtos estrela. Con esta cita tamén se busca recuperar as tradicionais feiras de Silleda que se celebraban antigamente os días 6 e 23 de cada mes. “Entre as datas que barallamos, e que propuxemos aos comerciantes para que elixiran a máis convinte, sempre se estableceu que a campaña rematase un día 6 ou 23 para comezar a recuperar precisamente as feiras tradicionais”, engade a alcaldesa, Paula Fernández Pena. Durante esta xornada de venda na rúa tamén está previsto realizar outras actividades de animación así coma os  sorteos da campaña (un a cada hora e 10), ou degustación de produtos coma o lacón ou a empanada, “que son xa produtos 10 de Silleda”. Esta xornada de venda será de 10 da mañá a 10 da noite.

 

Calidade 10, a premisa

Unha das liñas maestras desta iniciativa, pioneira en Galicia, pasa por ofrecer produtos con calidade e garantía. “Non é unha feira de saldos, nin un outlet”, remarca Paula Fernández, “senon unha proposta novidosa para incentivar as compras”.

Dende a Concellería de Comercio, que promove a iniciativa asumiuse a campaña de márquetin de Silleda 10, coa edición de 5.000 trípticos, carteis e bolsas co logo desta iniciativa, que aspira a repetirse en anos vindeiros. Do mesmo xeito nos vindeiros días o Concello de Silleda comezará a utilizar nas comunicacións oficiais papel que inclúa o logo desta iniciativa.

Nesta mesma liña, a alcaldesa tamén explicou que está previsto usar o Silleda 10 como “imaxe de marca do noso municipio”, para o que se fará unha proposta a distintas empresas de cara a que inclúan o logo de Silleda 10 a modo de etiqueta. “En Silleda temos produtos locais que son merecedores de ter un selo de calidade propio”, sinala a rexedora.

Escenografía en Turexpo e páxina web

A promoción deste evento comezará xa mañá no certame Turexpo, que se celebra no recinto feiral da Semana Verde. Así, no stand do Concello de Silleda farase promoción do Silleda 10, programa co que se espera atraer a numeroso público en Silleda. Neste certame o programa contará, a proposición dos propios comerciantes, cunha escenografía na que se amosarán algúns dos produtos 10 da campaña silledense.

Ademais o programa tamén conta cun espazo web propio (www.silleda10.com), feito polo propio sector,  na que se irán colgando día a día as ofertas 10 de cada un dos establecementos participantes.

Tanto Paula Fernández como Klaus Brey agradecen “a gran implicación e a colaboración dos establecementos participantes”, así como da asociación ECOS para a posta en marcha dun programa que se converte na estrela das accións no ámbito do comercio, e na que se creou unha comisión organizadora na que os establecementos se agruparon por sectores. 

Declaración da Rede de Dinamización Lingüística con motivo do Día Internacional da Língua Materna. 21 de febreiro de 2013

 

 

 

O Día Internacional da Lingua Materna, instituído pola Unesco no ano 1999, convídanos a contemplar a diversidade lingüística humana coma unha vantaxe que contribúe tanto á riqueza cultural coma ao desenvolvemento dos pobos.

 

Esta visión tan axeitada e actual contrasta coa tradicional desconfianza que, dende os tempos bíblicos e o mito de Babel, presenta os idiomas como impedimentos para o entendemento entre persoas e comunidades. Mais, paradoxalmente, as linguas non só son os instrumentos de comunicación humana por excelencia, senón tamén os alicerces sobre os que construímos as nosas identidades, tanto individuais coma colectivas.

 

A Rede de Dinamización Lingüística súmase, pois, con alegría, á celebración do Día da Lingua Materna, cuxa filosofía comparte enteiramente. E faino consciente de que a contribución de Galicia a esa diversidade lingüística, sen a que non é posible o benestar dos pobos e o desenvolvemento equilibrado, é o seu idioma propio, a lingua orixinaria e exclusiva desta terra, portadora dunha cultura particular: o galego.

 

Respectar e usar o galego é, xa que logo, a nosa responsabilidade e o noso deber, mais é tamén a nosa oportunidade, o noso orgullo, a nosa vantaxe, a nosa sorte. Proporciónanos un xeito especial de estarmos no mundo; fainos únicos, irrepetibles e necesarios.

 

Por iso, a Rede de Dinamización Lingüística quere animar as familias, e os educadores en xeral, a transmitir a lingua galega dende a primeira infancia, impregnada da calor e do agarimo da casa.

 

Na primeira infancia –da man dos nosos pais e mestres- aprehendemos a realidade que nos rodea a través do filtro do idioma e da cultura, que, unidos, compoñen a urda sobre a que tecemos a nosa personalidade, a nosa identidade, o vestido que nos permitirá estarmos presentables, e mesmo campar, ante o mundo que nos rodea. Por iso ese primeiro idioma nos acompañará sempre, será sempre parte de nós, e estarmos orgullosos del axudaranos a sentirnos seguros de nós mesmos.

 

Quen teña como primeira lingua o galego ben pode, de feito, gabarse del. Non hai idiomas pequenos nin insignificantes, todos son un tesouro a través do que podemos expresar os nosos pensamentos e sentimentos, pero o galego satisfará tamén as expectativas de quen  busque unha utilidade plasmada en cifras: hai aproximadamente 6000 linguas no mundo e o galego ten máis falantes ca  5864 delas e máis presenza en internet ca 5963 deses idiomas. É unha lingua vital e, en termos relativos, maioritaria.

 

As familias galegofalantes non deben ter medo de educaren os meniños na lingua coa que máis intimamente se poderán comunicar con pais e avós. Valorar e defender o propio non exclúe o respecto e o interese polo resto. O galego non será un impedimento, senón unha base segura, para aprender outras linguas, coma o castelán ou o inglés.

 

As familias que non falen habitualmente o idioma propio de Galicia tamén poden contribuír a defender a lingua que é patrimonio de todos os galegos cunha actitude positiva cara a ela e cara á súa promoción e mais con cancións, xogos, libros... que permitan que o galego teña presenza dende os primeiros momentos no fogar.

 

A Rede de Dinamización Lingüística ten a vontade firme de apoiar as xeracións novas con bebés mediante a posta en marcha de programas de transmisión do galego e outras iniciativas que as fornezan de espazos de uso e de recursos para os pais e nais. Deste xeito, súmase á Xunta de Galicia, á Unesco e ao resto dos organismos que promoven ou apoian o Día Internacional da Lingua Materna, coa satisfacción e o compromiso de achegar o seu traballo a prol dun idioma de futuro e da diversidade lingüística mundial.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

O programa Silleda Solidaria agradece as doazóns feitas polos colectivos colaboradores

 

Silleda, 19 de febreiro de 2013. O programa Silleda Solidaria vén de recibir nos últimos días doazóns artelladas polos colectivos que participan nesta iniciativa municipal. O pasado venres realizouse a través do programa un chamamento solidario para facer acopio no banco de alimentos de produtos coma leite e comida para bebés. Esta chamada tivo unha pronta e exemplar resposta, xa que nas últimas horas chegaron ao departamento de Servizos Sociais produtos doados por colectivos colaboradores.

Dende o citado departamento municipal, que coordina esta rede de axuda para os veciños/as e familias con menos recursos, enviaronse nas últimas semanas distintos avisos sobre recursos dispoñibles e outros necesarios. Este programa interconecta aos Servizos Sociais, que supervisan o proxecto, coas asociacións silledenses, que colaboran, e que a día de hoxe superan xa a quincena.

No portal web municipal o programa Silleda Solidaria conta con espazo propio no que poden interactuar os Servizos Sociais e asociación, que tamén reciben as mensaxes vía SMS. Os colectivos tamén poden poñerse en contacto co programa no caso de que detecten algunha situación que precise da intervención dos Servizos Sociais.

Nos últimos días ademais das doazóns de alimentos tamén se fixo entrega dende o Silleda Solidaria de dous carriños de bebés a familias do municipio.

Dende este programa municipal quere facerse extensivo o agradecemento a todas as asociacións, empresas e particulares que se sumaron ao programa e están a colaborar e a participar activamente.

Entre as liñas de actuación, ademais do aprovisionamento de alimentos, libros, mobles e outros enseres, ou roupa, -potenciando o roupeiro municipal- inclúese a dotación dun centro de alonxamento social na casa da estación de Ponte Taboada, actuación que segue tramitándose ante o Adif, e a creación de hortas solidarias. Nos vindeiros meses iranse materializando algunhas destas propostas.

 

 

Comeza a elección dos Consellos Parroquiais no municipio silledense

 

Silleda, 13 de febreiro de 2013. A Concellaría de Participación Cidadá, que dirixe Matías R. Da Torre, inicia a semana próxima o calendario de votacións para elixir ás persoas que formarán parte dos Consellos Parroquiais, entidades de representación a nivel parroquial que xurden ao abeiro do Regulamento de Participación Cidadá aprobado o pasado ano.

O calendario arranca o vindeiro luns día 18 en Pazos ( de 18.00 a 21.00 horas) e continuará nesa mesma semana en Cira, Rellas, Abades e Saídres. A axenda complétase en Taboada (día 25); Parada (26) e Vilar (27) . No mes de marzo as eleccións continuarán en Breixa (día 1); Dornelas (4); Oleiros (5); Ansemil-Martixe (6); Cervaña (7); Margaride (8); Moalde (11); Ponte (12); Graba (13); Xestoso (14); Lamela (15); Cortegada (18); Refoxos (19); Laro (20); Escuadro (21); Carboeiro (22); Negreiros (25) e Chapa o día 26.

Xa no mes de abril, logo da Semana Santa, a axenda retómase o luns día 1 en Siador; o martes día 2 en Fiestras, o mércores 3 en O Castro, o xoves 4 en Piñeiro e o venres 5  en Manduas.

A estas sesión están convocados presidentes e vogais de cada mesa, segundo sorteo celebrado o pasado 18 de xuño nas dependencias municipais, que serán os encargados de dar fe como veciños/as do proceso de elección. Tamén acudirá ás sesión un traballador do Concello de Silleda para levantar as actas de escrutinio de cada xornada .

Para presentarse a estas eleccións como candidatas/os os requisitos son: ter cumpridos 18 anos e estar empadroado na parroquia. Os interesados en ser candidatas/os poden dirixirse  por escrito á Concellaría de Participación Cidadá para,  ou ben mediante comunicación verbal ou escrita á  mesa 5 minutos antes de dar comezo á votación, ou por votación directa dos electores, sempre respectando a opción de renuncia por parte do elixido.

Nas votacións poderán participar todos os veciños e veciñas maiores de idade para elixir aos/as  seus representantes aos que poderá unirse un  representante elixido en asemblea pola Asociación de Veciños, dos cales o que obteña o maior número de votos será Presidente e o segundo vicepresidente do Consello Parroquial.

 

O concelleiro de Participación Cidadá anima a toda a veciñanza das parroquias a votar “para escolleren os seus representantes democráticos nas parroquias por primeira vez, co fin de mellorar a conexión entre as parroquias e o Concello, lograr unha maior participación veciñal na vida municipal e, sobre todo, acadar un órgano que represente os intereses do rural silledense ao servizo de cada aldea e en beneficio da comunidade”, engade

 

Deste xeito, tamén anima a todos os veciños e veciñas a presentarse a estes comicios para traballar en común por mellorar as cousas en cada parroquia. “É unha responsabilidade que recae directamente na xente e desde a Concellaría de Participación Cidadá agárdase que se aproveite esta oportunidade de participación directa dos veciños nas decisións municipais”, engade Da Torre.

 

Dende o citado departamento municipal xa se levaron a cabo nos últimos meses reunións informativas obre o Regulamento de Participación Cidadá, e agora o proceso continúa coa elección dos Consellos Parroquiais órganos representante das parroquias  que terán como obxectivos a participación, consulta información e control da xestión municipal, que ao mesmo tempo permitirá e impulsará as propostas das/os veciñas/os e colectivos.

 

Segundo establecen as normas que regulan a participación nestas eleccións, o número de representantes de cada consello dependerá do número de residentes en cada parroquia así, ata 100 residentes, haberá 2 participantes; de 100 a 250, 3 representantes; de 251 a 500, 4 representantes e nas que teñan máis de 500, 5 representantes.

 As eleccións terán lugar nos locais sociais de cada parroquia e deixaranse un mínimo de 3 horas para a votación en furna (en principio a maioría das sesións están previstas entre as 19.00 e as 22.00 horas).

Na normativa tamén figura que as mesas estarán compostas por un/unha presidente/a, que será un veciño/a da parroquia elixido por sorteo entre o padrón de residentes; outro veciño/a como vogal e un traballador/a municipal que actuará tamén como vogal e levantará acta.

Todos os membros do Consello Parroquial serán renovados cada 4 anos, seguindo os tempos da lexislatura municipal.

 

 

 

 

Remata o proceso de selección para a concesión dunha Bolsa Feuga para tarefas de información turística en Carboeiro

O Tribunal cualificador, á vista da puntuación dos 11 aspirantes que asistiron ás probas de selección, propón conceder a bolsa a D. Alexandre Fernandez Ramos.

No arquivo adxunto pódese consultar a puntuación dos aspirantes

A ITV móbil de vehículos agrícolas volta a Silleda durante máis xornadas e con horarios máis amplos

 

Silleda, 9 de febreiro de 2013. O servizo da Inspección Técnica de Vehículos (ITV) agrícolas volta ao municipio de Silleda o vindeiro mes de marzo. Entre os días 1 e 18 o servizo estará en catro localidades a disposición dos gandeiros e agricultores da zona. En Laro a ITV móbil desprazarase os días 1 e 4 ata o campo da festa; na Bandeira estará os días 5, 6 e 7 na rúa da Esmorga (antiga C2); e en Escuadro situarase fronte ao cemiterio os días 8, 11 e 14 de marzo próximos. Por último, o servizo estará dispoñible en Silleda (detrás do centro de saúde), os días 15 e 18 de marzo. En todos os casos as inspeccións realizaranse en horario de 09.00 a 13.30 e de 15.15 a 18.00 horas.

Os interesados en solicitar este servizo deben concertar cita previa chamando ao teléfono 881.920.490 ou ben a través da páxina web www.sycitv.com, no apartado de cita previa.

No ano 2012 realizáronse un total de 650 inspeccións de vehículos agrícolas na unidade desprazada ata o municipio de Silleda. Así, á vista da elevada demanda, este ano dende o departamento de Medio Rural, que dirixe Antonio Couso, solicitouse unha ampliación do servizo, que se traduce en máis xornadas e máis horas de atención. Co tempo establecido, a capacidade sería para atender uns 750 vehículos, cen máis dos contabilizados no exercicio de 2012.

Nas vindeiras semanas colocaranse nas parroquias avisos informativos para dar conta dos lugares e horarios onde se realizarán estas inspeccións periódicas.

Ampliación da recollida de plásticos agrícolas

Por outra banda, dende a Concellería de Medio Rural tamén se informa de que o prazo para avisar da recollida de plásticos agrícolas se amplia ata o vindeiro día 16 . En principio estaba previsto que os avisos se recolleran ata o 13 de febreiro, para iniciar despois o calendario de recollida. Aínda así, séguese a manter o inicio da recollida para o día 18 de febreiro, polo que dende o departamento de Medio Rural se pide aos gandeiros e gandeiras que se acolleron ao servizo que teñan listos os plásticos (limpos de residuos e atados) porque dende o luns 18 procederase a realizar a recollida. Logo deste servizo xeral, a recollida manterase ao long de todo o ano “para evitar tamén a acumulación de residuos”. Esta é unha das melloras acadadas polo departamento que dirixe Antonio Couso logo das negociacións coa empresa Secope, xunto coa estrea da recollida de neumáticos para os gandeiros e a de cartóns. Os interesados en que se lles retiren estes residuos deben de chamar ao Concello, ao número de teléfono 986 580000.

Entra en vigor a aprobación inicial do PXOM, que estará exposto ata o 17 de marzo

 

Silleda, 16 de xaneiro de 2013. O Diario Oficial de Galicia (DOG) recolle hoxe o anuncio da aprobación inicial do Plan Xeral de Ordenación Municipal (PXOM) de Silleda, que tivo lugar o pasado 18 de decembro nun pleno extraordinario.  Con esta publicación, a última que restaba, comeza a contar a partir de mañá día 17 de xaneiro o prazo oficial de exposición pública do Plan Xeral. Terá unha duración de dous meses, a máxima permitida, co que o periodo de exposición se prolongará ata o vindeiro 17 de marzo.

Tamén con esta entrada en vigor da aprobación inicial do planeamento, a partir de mañá farase efectiva a preceptiva suspensión de licenzas de obra maior que é preceptiva naquelas zonas onde varíe a catalogación do solo. Cómpre reseñar que queda excluído da suspensión o parque empresarial Área 33, que se rixe polo seu propio plan parcial, así coma os permisos para ampliar explotacións agrarias no rural, de acordo coa disposición transitoria décimo primeira da Lei de Ordenación Urbanística e de Protección do Medio Rural de Galicia (LOUGA).

Así mesmo, logo desta última publicación, o documento tamén será remitido aos organismos sectoriais para os preceptivos informes. Segundo figura no acordo plenario do 18 de decembro o PXOM remitirase a departamentos da Consellería de Medio Ambiente Territorio e Infraestructuras, á Dirección Xeral de Patrimonio Cultural;  á Consellería de Medio Rural, Consellería de Economía e Industria, á Deputación de Pontevedra; aos Concellos limítrofes (Lalín, Vila de Cruces, A Estrada, Forcarei e Boqueixón).

O Boletín Oficial da Provincia (BOP) de Pontevedra tamén recolle hoxe outra publicación sobre o PXOM de Silleda. Trátase simplemente dunha corrección de erros sobre un parágrafo do anuncio, que fora publicado o pasado 7 de xaneiro.

Nas vindeiras horas o documento tamén se colgará na páxina web municipal  (www.silleda.es) nun banner destacado no inicio do portal. Neste espazo, ademais de consultar o planeamento, os usuarios/as disporán dun tutorial con información para cumplimentar os formularios de alegacións que tamén estarán na web municipal.

“Queremos que a exposición ao público sexa exemplar e que ninguén poida dicir que non viu o documento”, sinala a alcaldesa e responsable municipal de Urbanismo, Paula Fernández Pena. O documento pode consultarse xa nas oficinas de Urbanismo (rúa Alfonso Trabazo) dende o pasado 26 de decembro, logo da súa aprobación no pleno. Así mesmo, o día 4 de xaneiro comezou a axenda de visitas polo rural, con reunións que están a ter unha elevada afluencia de público.  Esta reunión son informadas a través de bandos municipais en cada unha das parroquias, ademais de avisos telefónicos ás residencias de cada localidade.

Reunións no rural e alegacións

A axenta de visitas iniciouse o pasado 4 de xaneiro en Parada

O calendario de visitas ao rural, que se prolongará ata finais de febrero,  continúa hoxe en Siador. O venres terá lugar a da parroquia de Chapa. Para a vindeira semana están previstos os encontros en Cira (luns 21), Lamela (martes 22); Piñeiro (23); Cervaña (24) e Graba (25).

En todas as reunión, a alcaldesa e responsable municipal de Urbanismo, Paula Fernández Pena, realiza unha explicación xenérica do que é e do que significa o documento, dando paso despois ás explicacións dos técnicos que detallan o contido relativo a cada parroquia e asesorán aos vecinos e veciñas ante as dúbidas ou se queren presentar alegacións.

En todas as reunión ademais tamén se entregan senllos dípticos para axudar aos veciños/as a interpretar os planos, un con información relativa a solo rústico e outra sobre o solo de núcleo rural. Ademais nas reunión os técnicos van acompañados de medios informáticos para poder recoller as alegacións ao término dos encontros.

Ata o momento rexitráronse 10 alegacións, 7 de particulares e outras tres que formulará o concello por erros na ubicación dun centro público e sobre a titularidade ou existencia de camiños. Nas reunións do rural non está a ser  habitual que se presenten reclamacións. “É moito volumen de información polo que é normal que o mediten e fagan as alegacións despois da xuntanza”, sinala Paula Fernández. A alcaldesa  incide en que coas reclamacións veciñais se espera mellorar o documento. 

 

 

 

Calendario Exposición Pública do PXOM no rural

 

CALENDARIO DE EXPOSICIÓN PÚBLICA DO PLAN XERAL

LUNS

MARTES

MÉRCORES

XOVES

VENRES

 

 

xaneiro:

 

 

1

2

3

4

Parada

5

6

7

Laro

 

8

Refoxos

9

Cortegada

10

Oleiros

11

Taboada

12

13

14

Vilar

 

15

16

Siador

17

18

Chapa

19

20

21

Cira

 

22

Lamela

23

Piñeiro

24

Cervaña

25

Graba

26

27

28

Martixe-

Ansemil

29

Pazos

30

31

 

 

 

 

 

 

 

 

 

 

 

 

 

febreiro:

1

 

 

2

3

4

Dornelas

 

5

Carboeiro

6

Fiestras

7

 

8

Moalde

9

10

11

Margaride

 

12

13

Negreiros

14

15

Rellas

16

17

18

Saídres

 

19

Abades

20

Breixa

21

OCastro

22

Ponte

23

24

25

Escuadro

 

26

Xestoso

27

Manduas

 

 

 

 

Parroquias por orde alfabética

Abades 19 de febreiro

Breixa 20 de febreiro

Carboeiro 5 de febreiro

Cervaña 24 de xaneiro

Chapa 18 de xaneiro

Cira 21 de xaneiro

Cortegada 9 de xaneiro

Dornelas día 4 de febreiro

Escuadro 25 de febreiro

Fiestras 6 de febreiro

Graba 25 de xaneiro

Lamela 22 de xaneiro

Laro día 7 de xaneiro

Manduas 27 de febreiro

Margaride 11 de febreiro

Martixe-Ansemil 28 de xaneiro

Moalde 8 de febreiro

Negreiros 13 de febreiro

O Castro 21 de febreiro

Oleiros 10 de xaneiro

Parada 4 de xaneiro

Pazos 29 de xaneiro

Piñeiro 23 de xaneiro

Ponte 22 de febreiro

Refoxos 8 de xaneiro

Rellas 15 de febreiro

Saídres 18 de febreiro

Siador 16 de xaneiro

Taboada 11 de xaneiro

Vilar 14 de xaneiro

Xestoso 26 de febreiro

Ir á primeira páxina Ir á páxina anterior 

 Ir á páxina seguinte Ir á última páxina