A cesión de terreos por parte de dous veciños de Graba permite a entrada do camión do lixo ao lugar de Barreiro

 

Silleda 25 de marzo de 2013. O camión de recollida de lixo xa pode acceder ao lugar de Barreiro, na parroquia silledense de Graba, grazas a cesión de terreos realizada por dous veciños da localidade ao Concello de Silleda. Esta cesión realízase por un periodo de dez anos. “O camión non podía maniobrar nin facer xiros, polo que as vivendas situadas neste lugar non tiñan ata o de agora un contenedor preto para darles servizo”, sinala o concelleiro de Medio Ambiente e Medio Rural, Antonio Couso.

Con esta cesión de terreos, o vehículo pesado poderá chegar ata Barreiro, onde xa se colocou un contenedor a finais da semana pasada. Dende o goberno municipal, agradécese a estes dous veciños a cesión dos terreos “un xesto en beneficio da parroquia que permitirá dar servizo de recollida de lixo a este lugar”, engade Antonio Couso.

 

Preto de un centenar de alumnos asisten ao X Curso de Música da Bandeira

 

O Curso de Música organizado pola Banda Recreativa de Cultural da Bandeira celebra a súa décima edición convertido xa nun referente a nivel galego. O certame comeza o vindeiro luns día 25 e rematará o xoves 28 cun concertó de clausura no que participará o alumnado e no que se entregarán os diplomas.

Ademais das sesións formativas con seis especialidades (frauta, Clarinete, trompa, tuba, trompeta e clarinete baixo-música de cámara), o ciclo da Bandeira continuará con diversas actividades. Así, o luns 25 haberá unha conferencia a cargo de Rafael Agulló Albors, director da Municipal de SIlleda, baixo o título La música para banda en el país del sol naciente. A cita será ás 20.30 horas na sala José Villaverde do auditorio Dopazo da Bandeira. O martes 26 (22.30 horas) o grupo de música moderna da Banda Recreativa e Cultural da Bandeira actuará na Taberna do Músico; o mércores 27, ás 23.30 haberá outra actuación no Bar Arume, cun tributo a Lee Morgan. O xoves terá lugar o concertó de clausura ás 20.00 horas no auditorio.

As prazas do curso, un total de 90, están xa todas cubertas, con alumnos e alumnas de idades moi diversas e procedentes de distintas localidades da comunidade. Este ano entre as novidades figura o ciclo adicado a clarinete baixo, especialidade que impartirá Xocas Meijide. O elenco de profesores destas sesión (en horario de 10.00 a 14.00 e de 16.00 a 19.00 horas) complétase con Fernando Raña (frauta); Venanco Rius (clarinete); Jordi Ortega López (trompa); José M. Redondo (tuba) e Roberto Pascual Bodí (trompeta). “Contamos con Mestres de primeiro nivel”, sinalou hoxe durante a presentación Diego Cuíña, membro da directiva, que explicou o programa xunto a Manuel Otero Payno, Belén Rodríguez e a concelleira de Cultura, Margarita Campos.

Esta última destacou que o curso da Bandeira “é un dos mellores de Galicia, tanto pola cantidade como pola calidade do profesorado”. Así mesmo, destacou que esta iniciativa, que se vén celebrando dende hai dez anos, “supón un plus para os alumnos das escolas de música do municipio silledense, xa que acadan un maior grao de especialización no seu instrumento, e aportando maior nivel ás dúas bandas coas que contamos en Silleda”, sinalou.

Margarita Campos avanzou que a intención da Banda e do Concello é apostar por un proxecto máis ambicioso para edicións vindeiras tratando de implicar tamén a Consellería de Educación. Do mesmo xeito, destacou as sinerxias que se crearán na localidade durante os vindeiros días coa hostelería e o comercio, pola cantidade de alumnos que acoden.

Adxudicadas a Construccións Areán as obras de mellora do Centro Cultural Vistalegre da Bandeira

 

Silleda, 22 de marzo de 2013. O Concello de Silleda vén de resolver o procedemento do contrato administrativo para adxudicar a obra “Mellora do Centro Cultural Vista Alegre da Bandeira”, que se iniciou o 24 de xaneiro coa aprobación do proxecto técnico de obra.  A adxudicación tramítase por procedemento negociado sen publicidade, cun prezo de licitación de 149.999,99 euros (IVE a parte). Das 11 empresas convidadas polo Concello de Silleda presentaron oferta un total de 5. Logo de abrir os sobres correspondentes á documentación administrativa (sobres A ), na sesión da xunta de goberno do pasado día 14 de marzo, concedeuse un prazo para que as empresas presentadas puideran subsanar os defectos na documentación destes sobres A.

Hoxe, noutra sesión da xunta de goberno, abrironse os sobres B, correspondentes ás ofertas económicas e técnicas. Vistas as ofertas, a xunta de gobernó adxudicou a obra a Construccións Areán, que propón 4 anos máis de garantía sobre o previsto nos pregos de contratación. Así mesmo, na súa oferta, a empresa asume todas as melloras propostas no proxecto: impermeabilización do soto, pintado especial anti humidade da fachada, dotación de estanterías de pladur na zona de biblioteca e instalación de lamas de madeira na parte esquerda da fachada (en principio só prevían no lado dereito).

Así mesmo tamén se tivo en conta a baixa na oferta económica. O prezo de licitación era de 149.999,98 euros (sin IVE) e a empresa presentou unha oferta de 146.500 euros. Tamén reduxo o prazo de execución das obras (algo presente en todas as ofertas) de 4 a 2 meses. O proceso continuará coa comunicación da proposta á empresa que deberá de presentar as correspondentes garantías para realizarse logo a adxudicación definitiva.

 

En outubro do pasado ano coñecíase a  resolución da subvención da Axencia Galega de Desenvolvemento Rural (Agader) no marco das subvencións aos proxectos dinamizadores das áreas rurais de Galicia, ás que o Concello de Silleda concorreu co proxecto de mellora do Centro Cultural Vista Alegre da Bandeira.

Segundo recolle a citada orde, para esta actuación concedéronse un total de 134.429,98 euros, o 89,6% do orzamento presentado (149.999,98 euros). Sen embargo, e coa suba do IVE aplicada dende o mes pasado, o custe total ascende a 181.4999,98 euros. Así, os 47.070 euros que restarían serían aportados por fondos municipais.

Nos orzamentos municipais de 2012 xa estaba prevista unha cantidade para a aportación que lle correspondería ao Concello, pero coa suba do IVA, dita partida deberá sufrir modificacións.

O proxecto busca a mellora da dotación do Centro Cultural Vista Alegre, todo un referente na comarca dezana no tocante á dinamización social e cultural. Con esta nova actuación poderase completar a dotación deste centro. Nas novas dependencias, na planta baixa, plantéxase un novo acceso. Dende o vestíbulo poderá accederse á aula, aseos, sala de exposicións, escenario e tamén ao antigo edificio. Na primeira planta o proxecto plantexa a dotación dunha aula multimedia e biblioteca.

Na parte exterior actuarase con gran sinxeleza, coa dotación dunha estreita franxa de céspede que remata nun zócalo de granito da sala de exposicións. También se prevé acceso axardiñado cara ao acceso principal.

Dende o goberno municipal consideráse que esta actuación permitirá materializar un proxecto moi necesario e que contribuirá a consolidar, aínda máis, o papel dinamizador do Centro Vista Alegre, mellorando os seus servizos e ofertas aos veciños da Bandeira e a súa contorna. “Trátase dunha das maiores inversións deste ano no municipio silledense”, sinala a alcaldesa, Paula Fernández.

Así mesmo, dende o executivo tamén se agradece á Axencia Galega de Desenvolvemento Rural que tivera en conta este  proxecto presentado polo Concello de Silleda, un dos que obtivo maior puntuación, e que responde, sen dúbida, aos obxectivos do programa, así como a colaboración inestimable da directiva da Asociación Vista Alegre.

Logo da resolución de Agader do 8 de outubro de 2012, a xunta de goberno local de Silleda aprobou o proxecto técnico de obra na sesión do pasado 24 de xaneiro. O proceso continuou na sesión do 21 de febreiro, coa aprobación do expediente de contratación e do prego de cláusulas administrativas.

Entre as axudas  de Agader figura tamén outra concedida ao Concello de Vila de Cruces para o equipamento do local social de Ferreirós, que xunto co de Vistalegre foron incluídos nun convenio entre ámbolos dous municipios dezaos precisamente para traballar unidos para a posta en valor da cultura e tradicións da zona.

 

Máis de 30 establecementos participan na feira exterior do programa Silleda 10

 

Silleda, 21 de marzo de 2013. Máis de 30 establecementos participarán este sábado día 23 na feira exterior do programa Silleda 10, unha iniciativa pioneira para a dinamización do comercio local. A cita poñerá o punto e final á primeira edición desta iniciativa na rúa Cartaxena, un emprazamento céntrico nunha rúa que foi ademais reformada recentemente. O Concello de Silleda instalará mañá unha carpa na rúa Cartaxena, á vista das previsións meteorolóxicas, para a celebración desta feira, que abriá ao público o sábado dende as dez da mañá ás dez da noite.

Roupa, calzado, complementos, flores e prantas, artigos de construcción, viaxes e seguros, libros, mobles, electrodomésticos, e produtos alimentarios serán algúns dos protagonistas desta xornada coa que remata o programa dinamizador posto en marcha pola Concellería de Emprego. Unha cita con produtos de calidade 10, a uns prezos 10. A rúa quedará pechada ao tráfico dende mañá venres ás 14.00 horas.

Ao longo da xornada haberá un total de 10 sorteos, ás horas e dez (10.10; 11.10; 12.10; 13.10; 14.10; 16.10; 17.10; 18.10; 19; e ás 20.10 horas). O gran premio final, que se sorteará ás 20.10 horas, consistirá en  compras por valor de 500 euros nos establecementos adheridos á campaña. O sorteo deste será o último, ás 20.10 horas.  Entre os premios figuran tres lotes de produtos de limpeza por valor de 75 euros cada un, donados pola firma local Disiclín; dous premios de de 20 €  cada un equivalentes a 10 lavados normais de coche (cada premio), por xentileza da Estación de Servizo Silleda; ou 20 puntos de revisión gratuita de vehículos ou pre ITV, que inclúe revisión de niveis, desgaste de elementos, freos, análises de gases; comprobación de perdas de aceite, pastillas de freo…Estes premios chegan da man de varios talleres silledenses (Barrio , Carbón, Dario,  Taín, Tato e Sixto) A campaña, coa calidade como máxima, comezou o pasado día 14 e rematará o décimo día con este certame de venda na rúa.

Degustacións de lacón e empanada e recuperación de feiras

Así mesmo, a xornada tamén contará coa colaboración de dous colectivos gastronómicos do municipio como son a Asociación de Amigos da Empanada da Bandeira e a Asociación Cultural O Lacón, que ofrecerán ao público asistente degustacións destes dous embaixadores de Trasdeza.

A degustación de empanada será sobre as 13.30 horas e a de lacón (asado) sobre as 20.00 horas.

A coincidencia da xornada nun día 23 tamén ven a significar o inicio da recuperación das tradicionais feiras de Silleda, que se celebraban os días 6 e 23 de cada mes. “Queremos que este sexa o inicio do proceso de recuperación destas citas tradicionais”, sinala o concelleiro de Comercio, Klaus Brey.

Dende a organización faise extensivo o agradecemento a todas as empresas e asociacións que participan apoiando tamén esta iniciativa pioneira e novidosa, na que veñen participando 54 establecementos dende o pasado día 14 de marzo e anímase a todo o público en xeral e aos silledenses en particular a asistir a esta xornada feiral, “na que se potenciarán os produtos locais e o noso comercio, sempre coa calidade como grande referencia”.

 

O Concello de Silleda remata a recuperación da área de Covián coa construción dunha pasarela sobre o río Toxa

 

 

Silleda, 20 de marzo de 2013. A área recreativa do muíño de Covián, na parroquia silledense de Rellas, xa conta coa agardada pasarela de madeira que une as dúas beiras do río Toxa. Esta construcción era unha das actuacións máis emblemáticas que aínda quedaban pendentes, e que formaba parte do programa electoral do actual goberno silledense.

A mellora deste entorno completarase nos vindeiros meses coa sinalización da área recreativa e paneis informativos sobre a mesma, así como coa realización de tarefas de limpeza e adecentamento.

O muíño de Covián é unha construcción única na comarca do Deza polas súas características e dimensións. O edificio, que data do ano 1810 segundo a inscrición que reza na entrada, e que foi cedido polos seus propietarios ao Concello de Silleda durante un periodo de 25 anos, ten unha superficie de 82 metros cadrados e catro moas, o que o converte nun dos máis grandes da comarca. O Concello de Silleda iniciou a súa recuperación no ano 2007, durante o mandato de Paula Fernández, a través do Obradoiro de Emprego Ponte da Pedra I, que contou cos módulos de forestal, canteiría e carpintería.

 

“A construcción desta pasarela sobre o río foi unha das promesas que protagonizou a nosa campaña nas municipais, xa que quedara pendente de realizar logo da importante inversión que se realizou a través do obradoiro de emprego, cuns 600.000 euros”, lembra o concelleiro de Obras e Servizos, Manuel Cuíña, que hoxe visitou o lugar acompañado do concelleiro de Medio Ambiente, Antonio Couso. 

A inversión realizada agora, con fondos municipais, achégase aos 10.000 euros, coa dotación da pasarela, limpeza e a colocación de sinais e paneis.

Dende o goberno municipal tratarse de promocionar este entorno natural único,  co muíño como elemento etnográfico e patrimonial, e que está situado ademais a uns 100 metros da Ruta da Prata. A área recreativa de Rellas conta con mesas, bancos e outro mobiliario para uso e disfrute dos cidadáns.

 

 

Colocados os 10 puntos de recollida de pilas en centros públicos

 

 

Silleda, 19 de marzo de 2013. Hoxe rematouse o reparto dos 10 colectores de pilas que estarán a disposición dos veciños e veciñas nos centros públicos do municipio, un servizo no convenio de colaboración entre a  Xunta de Galicia e as entidades Xestoras de Sistemas Integrados de Xestión (SIX) para a recollida de pilas e acumuladores. Os ‘Recopiladores’  están xa situados na Casa do Concello, Casa da Xuventude, Casa da Cultura-Biblioteca; Centro Social dos Maiores; Escola de Música Municipal  e Centro de Saúde.

Tamén se distribuiron colectores na vila da Bandeira, que estarán no Centro Cultural Vista Alegre; Centro Social dos Maiores; Centro de Saúde e no Auditorio Municipal Manuel Dopazo.

O citado convenio posibilita distintas fórmulas de xestión, e no caso de Silleda optouse pola que só compromete ao Concello a recepcionar e almacenar, de xeito temporal, os residuos que se recollan. Así, serán as entidades xestoras  (no caso de Silleda a empresa Ecopilas) as que coordinen e costeen o servizo de recollida e transporte.

Así mesmo, para as persoas que teñan unha cantidade máis grande de pilas ou baterías recomendase acudir ao Punto Limpo, servizo gratuito aberto ao público todos os mércores e sábados de 09.00 a 14.00 horas.

Dende o departamento de Medio Ambiente, que dirixe o concelleiro Antonio Couso, acordáronse estes puntos de recollida  con Ecopilas, situándose en lugares públicos, onde se rexistra unha maior afluenza de público, para facilitar os depósitos aos veciños e veciñas do municipio. 

Suspendido de forma temporal o proceso de elección dos Consellos Parroquiais

 

Silleda, 19 de marzo de 2013. O goberno municipal de Silleda decidiu suspender de forma temporal o proceso de elección dos Consellos Parroquiais, que se iniciou o mes pasado. Esta mesma mañá comezou a informarse aos veciños/as das parroquias nas que aínda estaba por celebrarse a votación, mediante bandos municipais, a decisión de suspender temporalmente o proceso.

O novo concelleiro responsable de Participación Cidadá, Manuel Cuíña, explica que a decisión de suspender de xeito temporal o procedemento, chega logo de ver a escasa participación da veciñanza nos comicios xa celebrados, así coma as renuncias. Ademais das que presentaron as persoas elexidas a sorteo para formar parte das mesas, tamén se produciron renuncias de representantes electos en catro localidades (Rellas, Margaride, Vilar e Breixa).  “A vista disto, estudiaremos o proceso para poder tomar unha decisión ao respecto”, sinala Manuel Cuíña.

A día de hoxe quedaban por celebrar eleccións dos Consellos Parroquiais en Refoxos, Laro, Escuadro, Carboeiro, Negreiros, Chapa, Siador, Fiestras, O Castro, Piñeiro e Manduas.

 

 

A parroquia de Abades celebra unha nova edición da Festa da Rosquilla o domingo día 31

 

Silleda, 18 de marzo de 2012. O vindeiro domingo de Pascua, a rosquilla volve a ser protagonista na parroquia silledense de Abades.  A localidade celebra a edición número 27 desta celebración, na que se ven exaltando este doce típico. A cita organizada pola Asociación de Veciños A Costa, de Abades ,volverá contar este ano cun obradoiro gastronómico de elaboración das típicas rosquillas de Abades, que se celebrará no local social da parroquia o vindeiro xoves e venres (días 21 e 22) a partir das 16.00 horas.

As persoas interesadas en acudir poden inscribirse na Casa da Cultura de Silleda ou ben poñéndose en contacto coa organización. O venres 22, a partir das 20.00 horas haberá unha degustación que servirá tamén como presentación da festa.

O domingo 31 a cita comezará ás 10.00 horas. Actuará a Banda de Música Municipal de Silleda e volverá a celebrarse o tradicional concurso de bolos de rosquillas, con premios aos tres primeiros é tamén á orixinalidade. Tampouco faltará a subasta dos bolos. Do mesmo xeito, tamén haberá bolos á venda e o público poderá degustar os doces protagonistas.  A misa cantada, despois da que terá lugar o fallo dos premios e a poxa dos bolos, contará coa participación do Coro de Ponteledesma.

 

Entrega de bolos, ata o sábado 30

Ao igual que en anos anteriores, os particulares e asociación poderán colaborar nesta festa tradicional coa achega dun bolo de rosquillas que participará no concurso gastronómico. O último día para entregar os bolos será o sábado 30 de marzo, chamando ao número 629 256 584.

 

Realizadas obras de reafirmado na estrada de Portodabalde, en Parada

 

Silleda, 14 de marzo de 2013. Na xornada de hoxe realizáronse obras de mellora na estrada de Portodeabalde, na parroquia de Parada. Dende a Concellería de Obras e Servizos, o seu titular, Manuel Cuíña, explica que se acometeron por parte da empresa adxudicataria traballos de reafirmado neste punto, onde os graves afundimentos do asfalto apremian obras de reposición.

Cuíña explica que se decidiu realizar esta actuación “ante a imposibilidade de iniciar os traballos previstos, e incluídos no Plan de Investimentos da Deputación, polo elevado caudal do río Refoxos ao seu paso por esta localidade”.

A Deputación adxudicou no mes de decembro á empresa Pena Caramés os traballos de reparación do vial, á altura da ponte sobre o río. Dende entón os traballos foron retrasándose por esixencias da dirección técnica.

As obras foron incluídas pola Concellería de Obras e Servizos no Plan de Investimentos (PID), por importe de 34.001 euros, advertindo da urxente necesidade da reparación deste vial, no que o goberno local xa restrinxiu dende agosto o tránsito de vehículos pesados.

 

A Concellería de Cultura e Participación Cidadá programa 9 obradoiros de arte e artesanía para o rural

 

Silleda, 8 de marzo de 2013. A Concellería de Cultura e Participación Cidadá, que dirixe Matías R. Da Torre, vén de programar para este ano unha variada oferta de obradoiros para desenvolver nos centros sociais das parroquias. En total ofértanse nove modalidades, impartidas todas elas por artistas e artesáns silledenses.

José Villar (Taller 1924) será o encargado de impartir o obradoiro de coiro, especialidade da que se ofertan dous ciclos (un básico e outro con máis técnicas). Os creadores locais Jorge Conde e Fernando Rodríguez encárganse do obradoiro de artes plásticas (cerámica, gravado con linóleo…) e Adriana Rey do de abalorios.  Os artesáns Manuel Liñares e Carmén Recimil impartirán o de cestos e sombreiros de palla; Francisco Alén o de pintura (óleo). Así mesmo, tamén figura no programa un obradoiro de teatro, que será impartido por Ana Fares. A arte floral será outra das protagonistas, con Marbelis Hernández que se encargararía de outros dosuc ciclos (centros de mesa con material reciclado e arte floral con flora artificial).

“Dende esta Concellaría queremos que os centros sociais das parroquias se convirtan realmente en lugares nos que se desenvolvan actividades culturais e sirvan para que os veciños e veciñas se reúnan e aprendan xuntos, neste caso, distintas técnicas artísticas”, sinalou o concelleiro Matías R. Da Torre, que presentou hoxe o programa de obradoiros no rural xunto con algúns dos artistas que impartirán as sesión. Ademais de José Villar asistiron Carmen Recimil , Adriana Rey e Ana Fares. O concelleiro destacou que ademais de facerse “por vez primeira unha programación dende un punto de vista máis cultural e artístico”, ofrécese ademais a posilidade de facer grupos interparroquais, no caso de que nunha parroquia non se xuntara o número mínimo de persoas que se precisan para desenvolver os curso. Estes teñen tamén unha duración propia e un custe. “Dende o Concello o que facemos é unha labor de coordinación e programación”, sinalou Da Torre, quen explicou que se veñen de enviar cartas aos veciños e veciñas do rural informando do programa.

Así mesmo, tamén incidiu en que é a primeira vez que todos os /as monitores son de Silleda, “o que demostra que hai un potencial importante, e os silledenses debemos de valorar o noso”, engade.

Da Torre explicou que o inicio das actividades, previsto para a primavera, dependerá das inscricións realizadas nas parroquias. As inscricións poden realizarse chamando á Casa da Cultura (986 581028) ou a través do correo electrónico casa. cultura@silleda.es

 “De igual xeito pode suceder que cos veciños dunha soa parroquia, non se dea cuberto o número de alumnos necesario para que un determinado obradoiro se poida impartir, neste caso poden participar no mesmo veciños e veciñas de distintas parroquias e completar así o número de alumnos que se require en cada curso. Neste caso o lugar de celebración do obradoiro, composto por persoas de diferentes parroquias, sería  a convir entre todos”, engade o concelleiro

 

Ir á primeira páxina Ir á páxina anterior 

 Ir á páxina seguinte Ir á última páxina