O Concello de Silleda instalará estufas de pellets en dez centros sociais do rural

Silleda, 28 de agosto de 2017.  O Concello de Silleda instalará nos vindeiros meses un total de dez estufas de pellets noutros tantos centros sociais do rural. Esta dotación, nos locais parroquiais que na actualidade non dispoñen destas estufas, instalaránse nos centros de Refoxos, Fiestras, Parada, Margaride, Chapa, O Curro (Cira), Piñeiro, Cervaña, Martixe e Carboeiro.

A actuación lévase a cabo a través dunha liña de subvencións do Instituto Enerxético de Galicia (INEGA). Así, dos 2.117,50 euros que custa cada unha delas, esta entidade subvenciona un total de 1.694 euros.

“Na última ronda de reunión nas parroquias que tivemos comprobamos que quedaban localidades que aínda non dispoñen deste tipo de instalacións que sí figuran noutros centros sociais, polo que con esta actuación damos resposta a unha das demandas comúns nestas localidades”, indica o alcalde, Manuel Cuiña.

Coa colocación destas estufas as parroquias antes citadas disporán dun novo servizo para poder realizar actividades durante o inverno nos locais sociais. “Nos últimos anos fomos realizando melloras, moitas delas en colaboración cos colectivos veciñais, e agora continuamos completando a colocación destas estufas de pellets nos lugares que aínda non dispoñen delas”, engade Cuiña.

 

A Concellería de Benestar organiza unha excursión a varias localidades de Portugal do 3 ao 6 de outubro

Silleda, 25 de agosto de 2017.  A Concellería de Benestar Social de Silleda que dirixe Pilar Peón, programa unha nova excursión a través do Club do Centro Social dos Maiores a principios do vindeiro mes de outubro, no marco do programa municipal Silleda Activa. O destino será o veciño Portugal, con visita a varias localidades entre os días 3 e 6 de outubro.

Na primeira xornada a saída será ás 07:00 horas dende Silleda e A Bandeira, con visita e xantar en Aveiro, parada pola tarde en Nazaré e cea e noite en Setúbal. Dende alí, a expedición trasladarase o día 4 a dúas coñecidas e turísticas localidades do entorno, como son Sintra e Estoril. O día 5 visitarán Lisboa, coñecendo tanto o centro histórico como outros puntos da cidade.

Na última xornada, a do venres día 6, visitarase xa no traxecto de volta as vilas de Óbidos e Coimbra.

O prazo de inscrición abrirase o vindeiro venres día 8 de setembro. O prezo da viaxe, con todo incluido, é de 245 euros por persoa. Os interesados poden informarse e inscribirse na Casa da Cultura de Silleda ou chamando ao teléfono 986 581028.

O Concello pon a disposición dos veciños o céspede artificial retirado do campo de Outeiriño

Silleda, 17 de agosto de 2017.  O Concello de Silleda porá a disposición dos veciños e veciñas céspede artificial sobrante do que se retirou do campo de fútbol de Outeiriño.

Este equipamento, que se renovou recentemente, xa foi instalado en distintos puntos e infraesturturas municipais (rotondas, instalacións coma as piscinas…), pero toda vez que hai cantidade suficiente deste material, dende o Concello decidiuse poñelo tamén a disposición dos particulares.

“Como hai metros suficientes do césped retirado todas aquelas persoas que o desexen poden solicitalo no Concello”, indica o alcalde.

As persoas interesadas deben de facer unha solicitude por escrito no Rexistro Municipal.

Esta herba artificial, que xa non servía para a práctica de fútbol, foi retirado o mes pasado logo da renovación de todo o terreo por parte do Concello, cunha inversión de máis de 200.000 euros realizada a través do Plan Concellos da Deputación de Pontevedra.

 

Silleda acolle un ciclo formativo sobre búsqueda de emprego para mulleres en situación de vulnerabilidade

Silleda, 23 de agosto de 2017.  O Centro de Información á Muller (CIM) de Silleda  promove un ciclo formativo sobre habilidades e destrezas socio-comunicativas para a búsqueda activa de emprego, unha iniciativa dirixida a mulleres en situación de vulnerabilidade.

O ciclo, baixo o lema Xénero e vulnerabilidade, está subvencionado pola Deputación de Pontevedra, e conta cun total de 15 prazas. A inscrición pode formalizarse dende mañá xoves día 24 ata o vindeiro 1 de setembro nas oficinas do CIM, no Centro Social de Silleda.

Con este ciclo, búscase facilitar a inserción laboral das mulleres participantes, mediante un proceso de preformación no que se desenvolvan accións para o emprego destinadas a mellorar as competencias persoais e profesionais, contribuíndo a súa recuperación social a través do mercado laboral.

Tamén se aposta polo empoderamento das mulleres participantes, posibilitando o seu desenvolvemento integral e saúdable.

 Aplicar estratexias de resolución de problemas, con autonomía e creatividade, planificando as accións, valorando os resultados e reflexionando sobre as dificultades e sobre as posibilidades de mellora, é outro dos obxetivos do programa, co que tamén se pretende compensar as desigualdades froito dun devir histórico e sociocultural sexista.

Dende o CIM, da Concellería de Igualdade,  advírtese que as mulleres en situación de vulnerabilidade presentan en maior medida unhas taxas de desemprego máis elevadas, e contan con ingresos inferiores, e polo tanto con maior dependencia económica.

A menor autonomía persoal así como a pouca valoración social das súas potencialidades coa consecuente menor autoestima e outra das motivacións deste plan formativo para facer posible que o colectivo de mulleres en situación de vulnerabilidade poida incrementar as súas competencias socio-comunicativas básicas para levar a cabo unha búsqueda de emprego activa e eficaz, así como mellorar as competencias sociais e emocionais.

Así, tamén figuran entre os obxectivos facilitar a integración social, laboral e a independencia económica das mulleres en situación de vulnerabilidade, ou consolidar a igualdade de trato e de oportunidades no ámbito laboral, apoiando medidas que faciliten o acceso das mulleres a empregos de calidade e a súa estabilidade e desenvolvemento profesional.

Dez bloques formativos

O ciclo desenvolveráse dende o 4 de setembro ata o 9 de novembro, cun total de 10 bloques formativos. Así, abordaránse cuestión como a comunicación, escoita activa, o uso das redes sociais na búsqueda activa de emprego, o primeiro contacto co mundo laboral, emocions, ou asertividade e empatía, entre outros.

 

Chega a Canéjan a expedición silledense que participará nos actos de intercambio cultural ata a vindeira semana

Silleda, 22 de agosto de 2017.  Hoxe chegaron a Canéjan (Francia) os membros da expedición silledense que participarán ata o próximo luns 28 no programa de intercambio cultural. A comitiva partiu a pasada madrugada, con 20 membros do grupo de música e baile tradicional Fortín da Pomba e coa concelleira de Cultura, Ana Luisa González Costa, en autobús.

Á súa chegada foron recebidos polo alcalde de Canéjan, Bernard Garrigou, e pola  presidenta co Comité de Irmandamento e Relacións Internacionais da localidade, Daniele Antoniazzi.

Ademais de visitas e outras actividades culturales o vindeiro sábado terá lugar o acto central na  localidade francesa que sellará durante estas celebracións o seu irmandamento con Silleda e a localidade húngara de Nagykowacsi.  Tamén estará presente a localidade italiana de Poggio Mirteto, coa que Canéjan está xa irmandada dende o ano 2003.

Estarán presentes na firma o alcalde, Manuel Cuiña, e a concelleira de Cultura, Ana Luisa González.

Mañá  mércores haberá visita a Bourdeaux, localidade próxima a Caneján, para coñecer esta cidade famosa entre outros pola súa producción vinícola.

O xoves o grupo visitará as localidades de Andernos e Audenge e o venres desprazaránse ata o Castelo de Puyfromage, entre outros ademais de participar nas actividades de “Alberga Europa”.

O sábado 26 será o día grande do programa coa xornada na que Canéjan firmará definitivamente o irmandamento con Silleda e a cidade húngara. O acto, no que participará o alcalde, Manuel Cuiña, terá lugar ás 18:30 horas no Centro Simone Signoret e contará coa actuación do grupo de baile e música tradicional silledense, ademais de outras actuacións de grupos dos países participantes.

Comezan as obras de mellora e dotación de iluminación o Parque Municipal das Pedrosas

Silleda, 21 de agosto de 2017.  Hoxe deron comenzó as obras do proxecto para a mellora integral do Parque Municipal das Pedrosas, un espazo natural e de lecer no entorno do casco urbano cada vez máis utilizado por veciños e veciñas.

A inversión ascende a 199.000 euros. Esta é unha das actuacións principais que se incluiron este ano por parte do goberno local no apartado de inversións dos orzamentos municipais, a través da cantidade que lle corresponde do Plan Concellos da Deputación de Pontevedra.

A actuación foi adxudicada hai varias semanas á empresa Miguez Xestoso que hoxe procedeu a iniciar os traballos. As obras inícianse coa reconstrucción do peche perimetral de piedra deste espazo, que estaba caído ou danado nalgúns puntos.

Esta actuación, xunto con outras melloras como a creación de sendeiros interiores súmase á gran movida del das obras: a dotación de luminarias.

 A iluminación deste entorno natural realizarase mediante sistema LED, polo que vén apostando nos últimos anos o Concello de Silleda, coa colocación de balizas.

Neste recinto ubícanse ademais un parque infantil, un parque biosaudable, outras instalacións xuvenís (con tirolina e outros aparellos) e unha cancha deportiva. “Trátase dun espazo natural e de ocio moi usado polos silledenses. Coa dotación de iluminación ampliaremos as posibilidades de uso deste parque municipal, xa que moitas das persoas que habitualmente pasean pola zona terán a oportunidade de facelo tamén pola noite”, explica o alcalde.

A mellora integral do Parque Municipal das Pedrosas é unha das obras máis destacadas para este ano por parte do goberno municipal, que xa aprobou nas últimas semanas outros proxectos que se materializarán con cargo ao orzamento municipal de 2017.

Presentadas un total de 88 solicitudes para o servizo lúdico educativo do Concello de Silleda

Silleda, 22 de agosto de 2017.  O prazo de solicitudes para participar no Servizo Lúdico Educativo do Concello de Silleda rematou hoxe cun total de 88 peticións formuladas en total. Neste número inclúese tanto as do servizo durante o calendario escolar coma para os campamentos de Nadal e verán.

A día de hoxe están cubertas todas as prazas ofertadas pero dende a Concellería de Educación decidiuse continuar recollendo solicitudes ata o vindeiro día 31 para aquelas persoas que desexen entrar na lista de agarda.

Os formularios para a inscrición están dispoñibles na Casa da Cultura, no propio Rexistro e tamén se poderán  descargar a través da web municipal (www.silleda.gal).

 Coa inscrición hai que axuntar unha serie de documentación, (fotocopia do Libro de Familia, fotocopia da tarxeta sanitaria do/a menor,  declaración da Renda 2016…), entre elas a autorización de domiciliación de recibos, cun formulario que tamén está dispoñible para os usuarios.

Para recibir máis información as familias interesadas poden dirixirse ao departamento municipal de Educación, chamando ao 986 581028.

 

 

O Concello de Silleda renovará a iluminación no entorno da zona deportiva escolar, da residencia e recinto feiral

Silleda, 18 de agosto de 2017.  O Concello de Silleda renovará a rede de alumeado público no entorno da zona deportiva , escolar e feiral de Silleda. A reposición e ampliación das luminarias afectará ao tramo da avenida Recinto Feiral (dende o cruce coa rúa da Estación), ao que da á Escola de Música, piscinas e campo de Outeiriño, e auditorio e Residencia e Centro de Día.

“Con esta actuación pretendemos mellorar os servizos nesta zona, frecuentada por numerosos usuarios ademais de aumentar a seguridade”, engade o alcalde, Manuel Cuiña.

O investimento ascende a 51.465 euros, financiándose parte desta actuación con cargo do Fondo de Compensación Ambiental. Esta obra foi adxudicada pola Xunta de Goberno Local á empresa Arteaga, logo dos trámites realizados mediante procedemento negociado sen publicidade.

Todas as luminarias destes tramos serán substituídas por outras de tecnoloxía LED. Así mesmo, nalgún caso poñeránse novos báculos. “Sustituiránse os que están situados na zona do auditorio da Semana Verde ou da Residencia por outros máis elevados, o que supón aumentar a luminosidade nesta área”, engade o rexedor. Con esta actuación o Concello de Silleda segue apostando mellorar servizos básicos coma o alumeado logo de distintas actuacións realizadas nos últimos anos en diversas rúas e localidades. 

A Festa da Empanada da Bandeira celebra o seu 43 aniversario como referente gastronómico

Silleda, 18 de agosto de 2017.  A  localidade da Bandeira celebra mañá o seu día grande das Festas de Verán, coa empanada como protagonista. A 43 edición da Festa da Empanada arrancará xa pola mañá co pasarrúas da Banda Recreativa e Cultural da Bandeira. Ás 13:15 haberá misa cantada na honra da Virxe das Ermidas, previa á actuación da citada banda.

A  celebración gastronómica dará comezo ás 18:00 horas, unha vez que xa estén todas as empanadas presentadas a concurso. A actuación do grupo Xirandola animará a xornada na carballeira, onde o xurado elexirá as pezas gañadoras nas categorías de profesionais e amas de casa.

A cita, organizada dende a Asociación de Amigos da Empanada recupera de novo a poxa das pezas ganadoras, logo dun ano sen celebrarse. O evento será presentado pola actriz e xornalista Fátima Mella. Ás 20:00 horas está previsto o pregón a cargo da actriz veciña da Bandeira Cristina Collazo, que promete sorprender cunha orixinal proposta. Unha vez coñecidos os premios ás empanadas máis sabedeiras procederase a subastar as pezas entre o público.

A cea das peñas, animada pola charanga Chourizo Criollo, prolongará a velada que continuará coa verbena na rúa Xeral a cargo das orquestras Fin de Siglo e Costa Oeste.

A Bandeira remata o programa festivo o domingo día 20, co Open de Petanca “Suso Otero”, e o concerto matutino a cargo das Bandas Municipal de Silleda e Artística de Merza, que seguirá á misa cantada polo Coro Vales Mahía e a posterior procesión.

Pola tarde haberá un obradoiro de xogos e xoguetes tradicionais de madeira para as familias (ás 18:00 horas na rúa Xeral) e o fin de festa estará protagonizado polas bandas de música de Silleda, Bandeira e Merza.

O luns, festivo local en Silleda

O luns día 21 será xornada de festivo local no municipio de Silleda.

Dende o Concello reitérase, unha mes máis, a prohibición de estacionar dende hoxe e ata a madrugada do luns en todo o desvío da nacional e apélase á colaboración da cidadanía para o correcto desenvolvemento das festas.

 

O Concello de Silleda logra a concesión de máis horas no Servizo de Axuda no Fogar

Silleda, 17 de agosto de 2017.  O Concello de Silleda vén de recibir comunicación da Consellería de Política Social informando da concesión dun reforzo de 6.307 horas máis o ano na prestación do Servizo de Axuda no Fogar (SAF). Este reforzo, que económicamente se traduece nun incremento do financiamento anual estimado de 59.882,70 euros, aplicarase a partir do vindeiro día 1 de setembro. Este incremento permitirá incorporar novos usarios ao servizo.

Dende o Concello de Silleda solicitouse o pasado mes de xuño este incremento de horas. “Agradecemos a concesión feita pola Consellería de Política Social, ainda que as horas seguen a ser insuficientes para atender aos usuarios”, engade a concelleira de Benestar Social, Pilar Peón.

A concelleira lembraba no seu escrito que a poboación do municipio maior de 65 anos supón arredor do 28% do total de habitantes. Na citada solicitude re´cordase que a modalidade de libre concorrencia medrou de xeito considerable no último ano en Silleda, ao acollerse a este aquelas personas ás que non lles asistía o dereito á atención no marco do sistema de atención á dependencia.

Na actualidade Silleda conta con unha dispoñibilidade horaria de 2.031 horas ao mes para o SAF na modalidade de dependencia, tendo así mesmo usuarios en lista de agarda por resultar estas insuficientes.

“Este incremento de horas é un paso adiante, pero debido ás características da poboación do Concello de Silleda, seguen facendo falta máis horas dispoñibles para poder dar cobertura real a todos e cada un dos nosos dependentes”, indica a concelleira. 

Ir á primeira páxina Ir á páxina anterior 

 Ir á páxina seguinte Ir á última páxina