O Concello agarda que a alegación dos propietarios da rúa Pintor Colmeiro sirvan para reforzar a tese que xa defendeu o goberno municipal

 

Silleda, 12 de febreiro de 2013. A alcaldesa de Silleda e responsable municipal de Urbanismo, Paula Fernández, ante a preocupación dos propietarios da rúa Pintor Colmeiro pola situación dese tramo no PXOM, lembra que no documento que se remitiu á Xunta no mes de maio, previo ao informe, esa zona “sí figuraba como solo urbano consolidado” algo que xa lle trasladaron a todos aqueles propietarios que viñeron a consultar o Plan Xeral ao Concello e  por iso, anima anima públicamente  a presentar a alegación conxunta “canto antes para así reforzar a proposta que fixemos inicialmente”, engade.  

Como xa se informou noutras ocasións, a Xunta de Galicia decidiu non aceptar esta zona como consolidada baseándose en dúas cuestións: que a rúa se abriu fóra da delimitación do casco urbano de Silleda fixada no PXOM do ano 82, e que a zona, a pesar de contar con tódolos servizos, non está consolidada xa que nos últimos anos apenas se rexistraron novas construccións.

“Nos defendemos que fora catalogada como sólo consolidado e por iso consideramos que as accións que inicien os propietarios, van a ser moi positivas xa que reforzan esta tese”, sinala Paula Fernández.

A alcaldesa remarca tamén que “sabemos con certeza que houbo acordos con anteriores alcaldes cando se abriu esta rúa, que as reclamacións que fan son certas, pero lamentablemente eses acordos non chegaron a plasmarse nun convenio urbanístico que se levara ao Pleno polo que carecen de validez”, sinala.

Di a alcaldesa que “esperamos ademais que este non sexa o único convenio que se asine de cara a mellorar o documento urbanístico, ainda que a súa aprobación conleve unha nova exposición ao público; confiamos que esta nova exposición se poida facer no mesmo periodo de resolución dos informes sectoriais para no retrasar a aprobación definitiva do plan”·

Neste caso, coa alegación seguirase o planteamento inicial do goberno local silledense, que vén defendendo que as aportacións e reclamacións dos veciños deben de servir para mellorar o Plan Xeral, e recordase que as alegación poden tramitarse no departamento de urbanismo ata o vindeiro 17 de marzo.

 

 

Catro restaurantes do municipio na iniciativa Xantares de Entroido

 

 

A hostalería de Silleda vén de xuntarse para realizar iniciativas conxuntas durante as festas do Entroido. Así, ademais de propostas coma Carna Bares, durante estes días celebrase a iniciativa pioneira Xantares de Entroido. É a primeira vez que locais silledenses dicados á restauración  se xuntan para facer unha iniciativa conxunta.

O concelleiro de Turismo, Matías Rodríguez da Torre, explica que se  trata “dun avance, que tentará no futuro que os restauradores do Concello tamén colaboren en poder promocionar so produtos típicos de Trasdeza, os cales tamén se poñen en valor nalgunhas das festas gastronómicas que se celebran durante todo o ano”

 

ADXUNTOS

Presentado á Mesa Local do Comercio o programa Silleda 10, que conta xa con medio centenar de inscritos

Silleda, 7 de febreiro de 2013. O Concello de Silleda acolleu hoxe unha nova sesión da Mesa Local do Comercio, na que foi protagonista o programa de dinamización Silleda 10. A falta de un día para o peche da inscrición (os comercios aínda poden anotarse na xornada de mañá venres) son xa 50 os establecementos que se sumaron a esta iniciativa pioneira, que se celebrará dende o 14 ao 23 do vindeiro mes de marzo.

Tanto o concelleiro de Comercio, Klaus Brey, como a alcaldesa, Paula Fernández, amosaron a súa satisfacción pola boa acollida que está a ter este programa, que ten como obxectivo revitalizar o sector e que xogando co número 10, símbolo de calidade, contará con diversas propostas para atraer aos clientes.

Nos vindeiros días, unha vez pechada xa a inscrición dos establecementos participantes establecerase un calendario para organizar esta iniciativa que rematará o día 23 de marzo con unha xornada de venta na rúa Cartaxena.

Na mesa local participaron tamén Rosa Mª Rivas, en representación da Administración Autonómica (como suplente do xefe territorial de Economía e Industria, Ignacio Rial, que non puido asistir); a presidenta do colectivo local ECOS, Fátima Costoya; e Alfredo Abeledo, traballador municipal, como secretario. No encontro disculpou a súa ausencia a última hora a representante da Federación de Consumidores, que non puido asistir por motivos de axenda.

No encontro, ademais dos detalles de Silleda 10, tamén se deu conta das actividades celebradas ao longo do pasado ano 2012. Así, ademais da campaña de Nadal, co concurso de escaparates, -no que se superaron as cifras de participación respecto a outros anos-,  ou a campaña da árbore, tamén se falou da iniciativa Vender máis Nadal, posta en marcha pola Deputación de Pontevedra, entre outras actividades. 

A marquesiña de Sante foi reposta polo Concello logo dos danos causados por un camión

Silleda,  5 de marzo de 2013. Operarios do Concello de Silleda remataron  nas últimas horas a instalación dunha marquesiña na parada de Sante, parroquia de Laro. Esta instalación, que se puxo nova hai menos dun ano  tivo que ser substituía logo de que un vehículo acabara empotrándose contra ela.

 

A marquesiña está xa instalada de novo, e dende o departamento de Obras e Servizos reclamarase agora o seu custe á compañía aseguradora do vehículo que causou os danos.

O concelleiro Manuel Cuíña lembra que esta dotación foi colocada en abril do pasado ano, logo de sete meses de intensas xestións para conseguir dar servizo a unha alumna que, de non contar con esta parada tería que camiñar algo máis de dous kilómetros para coller o autobús escolar.

 

A instalación foi asumida polo goberno autonómico, logo da petición formulada dende o Concello (que fixo a colocación) , que solicitou ademais que se contemplara esta parada no percorrido diario que autobuses que pasan pola estrada PO-530, en dirección Pontevedra ou Vigo.

 

 

Continúan as actividades do programa Silleda Activa, organizadas dende o Clube do Centro Social dos Maiores

Silleda, 5 de febreiro de 2013.

Logo da súa estrea en outubro do Logo da súa ano pasado, o programa Silleda Activa, organizado dende o Clube do Centro Social dos Maiores continuará  nos vindeiros meses  con novas actuacións que están a gañar cada vez máis adeptos.

Hoxe mesmo comezaron as sesións no Centro dos Maiores da Bandeira, onde se estrea o programa con grande éxito. Todos os martes, de xeito alterno, celebraranse obradoiros de alfabetización dixital e de memoria.

As sesións comezaron esta mañá co de alfabetización dixital, coa participación de 15 persoas que se familiarizan co uso e manexo dos teléfonos móbiles. Este obradoiro foi un dos que tivo maior éxito entre os usuarios do centro de Silleda, ao ensinar aos/as asistentes a sacar o maior rendemento posible dos teléfonos móbiles, sempre dun xeito sinxelo e asimilable para todos os participantes. O vindeiro martes comezará o obradoiro de memoria que se irá alternando co dos móbiles e no que xa hai anotados máis de 10 persoas.

Os interesados en participar nestas sesións, totalmente gratuitas e que se celebran en horario de 11.00 a 12.00 horas,  poden anotarse no propio centro.

 

Rosas para San Valentín

Mentres, en Silleda, ademais das clases de ximnasia terapéutica e do obradoiro interxeracional de pintura,  tamén voltan a partir do vindeiro día 13 as sesións de arte terapéutica.  Estes obradoiros nacen coa finalidade de ofrecer actividades diferentes e divertidas para os nosos maiores coa finalidade de promover o seu benestar físico, psicolóxico e social, traballando cos mesmos aspectos manipulativos á vez que creativos e imaxinativos e que reforcen o seu movemento tanto físico como mental.

As actividades levaranse no Centro Social dos Maiores de Silleda, todos os mércores en horario de 17:00 a 19:00 horas.

No desenvolvemento deste programa traballarase sempre dunha maneira activa, participativa, comunicativa, explicativa, interrogativa, colaborativa, variada, flexible…

Dita metodoloxía non será a tradicional, formalista, baseada na xerarquía educador - alumno, nin na clase maxistral, senón que se empregará unha metodoloxía totalmente dinámica, baseada nas propias experiencia dos nosos maiores, no descubrimento, na construción de coñecementos novos e na asimilación doutros xa existentes.

O programa de actividades comeza coa confección de rosas para San Valentín con medias de cores. As actividades que se desenvolveran serán sempre acordes con cada estación do ano, tratando de que sexan variadas e divertidas, formando despois os traballos realizados parte dunha exposición a principios do vindeiro mes de xuño.

Dende o Clube do Centro Social dos Maiores apóstase polo programa Silleda Activa como unha fórmula para ofrecer aos nosos maiores actividades alternativas e que contribúan a mellorar o seu desenvolvemento e fomentar a súa autoestima.

 

****O cadro de actividades do Obradoiro de Arte Terapéutica en Silleda é o que segue :

 

 

 

DIA

 

ACTIVIDADE

 

13 de Febreiro

 

Rosas para San Valentín con medias de cores

 

20 de Febreiro

 

Axenda ano 2003 e carteiras de goma eva

 

27 de Febreiro

 

“Un Peto de porquiño”

 

06 de marzo

 

Obradoiro de cociña “Bombóns de chocolate”

 

13 de Marzo

 

Cadro decorativo con plastilina

 

20 de Marzo

 

Boneca con papel hixiénico

 

3 de abril

 

Manualidades de Pascua

 

10 de Abril

 

Portavelas

 

17 de Abril

 

Marco decorativos para fotos

 

24 de Abril

 

Marca Páxinas Día do Libro

 

8 de Maio

 

Pisapapeis de “Xoaniña”

 

15 de Maio

 

Pedras Decoradas

 

22  de Maio

 

Obradoiro de “Cespinos”

 

29 de Maio

 

Lapiceiros con barro

 

5 de xuño

 

Arte Vitral

 

12 de Xuño

 

Obradoiro de Coiro

 

19 de xuño

 

Pousavasos e abanicos chinos

 

26 de Xuño

 

Taller de Marionetas con reciclaxe

 

3 de Xullo

 

EXPOSICIÓN DOS TRABALLOS REALIZADOS

 

 

 

O prazo para participar no programa Silleda 10 remata o venres día 8

 

Silleda, 4 de febreiro de 2013. O programa municipal Silleda 10 levarase a cabo finalmente entre os días 14 e 23 de marzo. Estas datas foron as que recibiron máis votos por parte dos comerciantes consultados na pasada semana.

A día de hoxe, na Concellería de Comercio e Industria hai xa  preto de 40 solicitudes rexistradas, de establecementos moi diversos do sector comercio, da hostalería e do turismo rural. “Estamos moi satisfeitos coa resposta, pero esperamos que se sigan sumando máis comercios para participar nesta iniciativa”, sinala o concelleiro de Comercio, Klaus Brey.

Así, e de cara a últimar a organización do evento e a campaña publicitaria, o prazo para participar rematará o vindeiro venres día 8. Todos aqueles que desexen sumarse deben de cubrir un formulario que está dispoñible no Concello e tamén se pode descargar na páxina web, que xa dispón dun banner específico no inicio sobre Silleda 10,  un programa municipal para dinamizar e promocionar o comercio local silledense.

Xogando co número 10, símbolo de calidade, farase unha campaña novidosa e con distintos atractivos para captar a público e potenciais clientes. Durante 10 días os establecementos participantes ofrecerán descontos 10 en produtos 10. O décimo día a campaña rematará coa venda na rúa. “A calidade dos produtos ofertados é unha das máximas desta iniciativa que rematará cunha xornada na rúa que non vén a ser unha feira de saldos”, aclara o concelleiro.

Así mesmo, tal e como xa se explicara tratouse de facer coincidir o remate nun día 6 ou 23 (como é finalmente o caso), datas de celebración dos tradicionais mercados da vila de Silleda, co que tamén se pretende comezar a recuperar estas citas.

Entre os participantes hai tamén algún comerciantes e hostaleiros que xa se ofreceron para colaborar na organización do evento e aos que dende o goberno local se lles agradece o xesto. “Se alguén máis está interesado en participar activamente na organización tamén pode informarnos ata o vindeiro venres”, engade Klaus Brey

Mesa Local do Comercio

Por outra banda o vindeiro xoves día 7 celebrarase unha nova sesión da  Mesa Local do Comercio, integrada por representantes da Administración Autonómica, do Concello, da Federación do Comercio, e de Ecos (Asociación de Empresarios e Comerciantes de Silleda), que abordará distintas cuestións relacionadas con esta actividade.

Silleda 10 é unha iniciativa pioneira en Galicia que pretende convertirse nun revulsivo da economía local e ter continuidade no tempo. A campaña desenvolverase nos 9 primeiros días nos propios comercios, que non teñen que asumir custes, e rematará coa venda na rúa.

En principio está previsto que a última xornada se celebre na rúa Cartaxena, un dos espazos urbanos máis comerciais da vila de Silleda que foi reformada e humanizada o pasado ano.

Nos vindeiros días, unha vez esté pechada a inscrición, tamén terá lugar a presentación pública da campaña. 

O Concello de Silleda remite ao Estado un informe sobre o elevado cumprimento do Plan de Axuste

 

Silleda, 2 de febrero de 2013. O Concello de Silleda vén de remitir ao Ministerio de Facenda e Administracións Públicas o preceptivo informe de seguimento do Plan de Axuste 2012-2022, aprobado ao amparo do Real Decreto 4/2012 e no que se impuxeron unha serie de medidas para equilibrar a contabilidade municipal.

Este plan, que foi aprobado por unanimidade dos tres grupos da Corporación silledense  no pleno ordinario celebrado o día 28 de marzo de 2012, recolle unha serie de medidas, tanto no capítulo de gastos coma de ingresos, que á vista do informe do departamento de Intervención se cumpriron superando mesmo as previsións iniciais.

Así, no tocante aos ingresos, os datos manexados da liquidación orzamentaria revelan que a variación respecto  ao previsto no plan de axuste sitúase nun 33,45% máis.

Este aumento vén dado, sobre todo, polo cobro de subvencións e outras axudas que non se incluiron no orzamento polo principio de cautela aplicado. Así mesmo, tamén hai que ter en conta a adopción de meidas xa previstas coma o aumento de determinadas taxas (escola de música, servizo de apertura de centros educativos fóra do horario escolar…) ou a aprobación doutras novas.

A alcaldesa e responsable municipal do departamento de Facenda, Paula Fernández Pena, advirte que no tocante aos ingresos, está aínda pendente de aprobar o aumento da taxa polo servizo de recollida de lixo. Como xa se explicou no último pleno “de momento a taxa manterase para 2013 porque estamos a barallar distintas posibilidades, sempre coa intención de aplicar a suba menos lesiva para os petos dos nosos veciños e veciñas”, sinala. Así, Paula Fernández sinala que dende o goberno municipoal se segue a estudar a posibilidade de sumarse ao servizo provincial da Deputación, cun convenio que foi revisado, “ e que debemos de estudar ben antes de tomar unha decisión”, sinala a rexedora, “por iso non aplicamos aínda a suba desta taxa que sabemos que temos que facer”, sinala.

En canto aos gastos, éstes sofren un amumento dun 9,33% respecto á previsión inicial do plan de axuste, debido a que,  como reflexa o informe non se tiña contemplado no mesmo o abono de 653.128 euros para o pago a proveedores con cargo precisamente ao RD 4/2012. “De non ser por esta cantidade, estaríamos moi por debaixo dos gastos previstos no plan de axuste”, sinala a alcaldesa.

En relación ao cumprimento das medidas que recollía o plan de axuste no ano 2012, no informe destácase o “descenso considerable” no capítulo de Persoal. No tocante á reducción da plantilla municipal á que obriga o plan de axuste , Paula Fernández, aclara que dende o goberno, “en vez de facer un ERE ou tomar outras medidas máis drásticas, optamos pola non renovación de contratos”. Como xa se informou con anterioridade, no ano 2012 houbo 5 contratos que non se renovaron.  A eliminación dos complementos de produtividade e a non contratación de xeito temporal, salvo en casos de servizos esenciais, tamén foron outras das medidas adoptadas.

En canto aos restantes medidas previstas, tamén se contempla unha diminución do gasto no capítulo de suvencións, e no de gastos correntes. “Fixemos un grandísimo esforzo para conter o aumento dos gastos, para non gastar máis do que dispoñiamos, ao contrario do que se viña facendo neste Concello”, dí Paula Fernández, que remarca que “o único servizo no que houbo recortes foi no alumeado público, cun plan de aforro que está a dar os seus froitos e que permite repoñer agora puntos de luz”.

No informe tamén se recolle que a diminución do gasto corrente deberá de consolidarse “de forma progresiva” nos vindeiros anos para lograr o equilibrio material do orzamento municipal, dacordo co establecido no plan de axuste.

O informe de Intervención tamén establece que o nivel de endebedamento se reduxo nun 2,88%. Do mesmo xeito, o remanente de tesourería para gastos xerais descende a -606.424,35 euros, cando o previsto era de -800.000 euros, “o que reflicte a mellora económica acadada”, engade a rexedora.

O informe conclúe que se ben no apartado de ingresos quedaría por facer a suba da taxa pola recollida do lixo, á espera de determinar a adhesión ao plan provincial, na vertente dos gastos hai unha diminución, que deberá continuar en exercicios vindeiros para lograr o equilibrio material en futuros orzamentos.

“En resumo, este goberno cumpliu co estipulado no plan de axuste que foi imposto para solventar a difícil papeleta económica que nos deixaron dirixentes anteriores neste Concello”, sentencia Paula Fernández, que apela “á responsabilidade de todos os grupos á hora de criticar medidas de axuste que estamos obrigados a facer por este plan, froito da mala xestión de gobernos precedentes, algo que debe de quedar moi clariño”.

 

 

 

 

 

 

O roteiro dos CarnaBares, o Tourentroido e o desfile de máscaras, centran o Entroido en Silleda

 

Silleda, 1 de febreiro de 2013. Silleda recibe ao entroido cunha variada programación que chegará a diferentes localidades. O programa arranca mañá na parroquia de Lamela co desfile e o Alto dos Xenerais, e continuaría a vindeira fin de semana.

Ademais da cita da Bandeira, outro dos destacamentos tradicionais do entroido do Ulla (días 8 e 9), a celebración na honra de Don Carnal chegará ata Silleda, Parada, Graba e Laro.

Estas últimas citas foron presentadas hoxe polos membros dos distintos colectivos organizadores e polo responsable da Concellería de Cultura, Turismo e Participación Cidadá, Matías R. Da Torre. “Optouse por unha programación extensa e con actividades diversas co fin tamén de apuntalar esta celebración grazas aos colectivos que colaboraron”, sinalou o concelleiro sobre unha celebración “que debe partir do pobo”.

No caso de Silleda, tratarase de revitalizar a celebración con actividades toda a fin de semana. O venres e o sábado á noitiña haberá a Ruta dos Carnabares, con 25 establecementos nos que se servirán tapas típicas destas datas. Na Bandeira tamén participan todos os bares, en Lamela outros dous e tamén haberá cita o domingo en Graba. A iniciativa está organizada en colaboración con Adellís, que xa o ano pasado comezou a recuperar o ambiente de entroido en Silleda coa colocación de antigas fotos destas festas nos establecementos.

Ademais, o venres día 8 unha ducia de establecementos de Silleda (da rúa Cartaxena e do seu entroido) celebran o Tourentroido, un concurso de disfraces nos que os participantes deben percorrer os locais para conseguir puntuación. Haberá tres premios, para grupos (300 euros); parellas (100 euros) e individual (50 euros).

O sábado a asociación Olaia organiza dúas citas nunha carpa que se instalará na praza da Feira Vella. Ás 17.00 horas haberá o Entroidiño Infantil, unha cita para os cativos/as con animación e chocolatada, e pola noite (22.30) haberá unha baile de entroido coa temática dos anos 70, 80 e 90, con premios aos disfraces que mellor representen estas décadas. Actuarán o grupo Somos III e un DJ.

Xa o domingo día 10 celebrarase o desfile de entroido dende a rúa Condes do Deza, cun fin de festa a cargo do Dúo Punto Zero. Haberá premios ás comparsas, as mellores parellas e individuais. No desfile participa activamente a Banda de Música de Silleda e a Escola Municipal de Música cunha comparsa na que participan todo o alumnado. A Asociación Feiral Semana Verde dará un premio ao que mellor represente a cultura rural.

Cita en Parada e estrea en Graba

Tamén en Parada a Asociación de Veciños da parroquia  organiza o seu entroido o vindeiro venres día 8 a partir das 22.00 horas, coa degustación de doces tradicionais e como novidade un concurso de máscaras con premios. O baile estará amenizado polo Dúo Master.

En Graba, a cita será o domingo día 10 antes do xantar, da man de Coto do Castelo, nunha cita na que non faltarán cabezudos, gaiteiros e postres do entroido.

Así mesmo, o luns 11 non faltará o tradicional baile infantil no Centro Cultural Vista Alegre da Bandeira e o martes a cita para os máis cativos será en Laro, co Feirón de Entroido organizado polas Mulleres Rurais O Candán.

Promoción na hostalería

O tempo de entroido chega a Silleda tamén coa promoción específica en restaurantes, cos Xantares de Entroido. Participan Victorino da Bandeira, Casa de Xantar A Culler, O que dirán e Tapería Pulpería Carballeira do Chousiño, con variados menús.

Da Torre agradeceu aos colectivos a súa participación, en especial ao sector da hostalería pola súa aportación á hora de dinamizar o municipio con estas actividades.

O sistema de videovixiancia no parque empresarial Área 33 xa está en funcionamento

 

Silleda, 31 de xaneiro de 2013.  O circuito de videoxiancia do parque empresarial Área 33 de Silleda está xa en funcionamento. A empresa adxudicataria, Segurgal, está realizando os últimos axustes para conseguir unha maior definición do encadre de gravación para poder identificar aos posibles autores de infraccións.

Así o explicaron hoxe a alcaldesa, Paula Fernández Pena, e os técnicos da firma instaladora durante a visita ao polígono, xunto co delegado territorial da Xunta en Pontevedra, José Manuel Cores Tourís e o xefe territorial da Consellería de Economía e Industria, Ignacio Rial.

A alcaldesa e o presidente do colectivo de empresarios de Área 33, Juan Carballo, agradeceron aos representantes da Xunta a concesión da axuda autonómica coa que se realizou a maior parte da dotación.

O custe foi de 28.894,66 euros  dos que 26.005,19 (0 90%) corresponden á  subvención de Industria e o resto a fondos municipais.  A axuda, con Fondos Feder, enmárcase na orde o 3 de abril de 2012, para a concesión de axudas encamiñadas á habilitación e mellora de infraestruturas dos parques empresariais, cofinanciadas  polo Fondo Europeo de Desenvolvemento Rexional (FEDER 2007-2013).

 

 

“Esta actuación é moi importante sobre todo no ámbito da prevención, xa que a existencia das cámaras vai disuadir posibles roubos e actos vandálicos”, apuntou a alcaldesa.

Paula Fernández avanzou que “aínda que non se produciron roubos importantes, sí se sustraeron materiais” e se ten constancia, tal e como figura no informe da Policía Local que acompañou a petición da axuda, de “bastantes casos de conducción temeraria nas rúas de Área 33”.

Durante a visita ás instalacións da base de Protección Civil, onde está o equipo que recibe o sinal das cámaras, a rexedora explicou que unha vez que rematen os axustes das cámaras (hai 6 intaladas e outro dous canles abertos, co que poderían instalarse outras dúas), o sistema estará conectado á sede da Policia Local de Silleda, onde os axentes poderán ter información en tempo real se se producen incidencias. Así mesmo, a instalación conta con todos os permisos pertinentes no relativo á protección de datos.

O Concello tramitou a petición desta axuda a petición dos empresarios para garantir a seguridade no polígono.

Más de 30 inscritos en Silleda 10

Por outra banda, Paula Fernández aproveitou a presenza do xefe territorial de Industria, Ignacio Rial, para entregarle material informativo sobre o programa Silleda 10, que a día de hoxe supera xa as 30 inscricións. Rial é un dos integrantes da Mesa Local do Comercio, da que se convocou xa unha nova sesión para o vindeiro xoves día 7 (ás 14.00 horas), para abordar a celebración desta iniciativa. “Estamos moi satisfeitos pola resposta do sector do comercio”, sinalou a alcaldesa.

 

 

As actuacións para o control das pombas comezarán nos vindeiros días

 

Silleda, 30 de xaneiro de 2013. A firma Larus Control iniciará nos vindeiros días o programa de actuación para o control poboacional da pomba comn (Columbia Livia Varia) no municipio de Silleda. Dende o departamento de Obras e Servizos,que dirixe Manuel Cuíña, aceptouse o orzamento presentado por esta firma, por importe de 3.927 euros.

Os traballos, segundo figura no programa de actuacións da empresa, prolongaránse ata o vindeiro mes de xullo. A presenza masiva destas aves está a causar nos últimos meses problemas en localidades como Bandeira,  onde a  gran cantidade de excrementos que xeran está a supoñer un preocupante problema de suciedade e salubridade que xa motivou as queixas dos veciños. Un dos puntos máis conflictivos está na rúa Xeral, xunto á parada dos taxis.  “Neste caso hai gran cantidade de pombas que aniñaron no edificio que está ao lado, que a día de hoxe está desabitado”, explica. A Asociación de Veciños de Manduas (Avema) xa trasladara no seu día as queixas ao goberno municipal pola situación das beirarrúas neste punto, case intransitables pola gran cantidade de excrementos.

Tamén se rexistra unha elevada concentración no último tramo da rúa Ramón de Valenzuela. “Podemos chegar a ter un foco de infección se non atallamos a tempo este problema”, sinala o concelleiro.

 

Ir á primeira páxina Ir á páxina anterior 

 Ir á páxina seguinte Ir á última páxina